អេស្ប៉ាញ៖ ខ្សែបម្រើសញ្ជាតិអ៊ុយរូហ្គាយ Federico Valverde បានព្រមព្រៀងបន្តកិច្ចសន្យាថ្មីជាមួយក្លិបអេស្ប៉ាញ Real Madrid ក្នុងកិច្ចសន្យារយៈពេល ៦រដូវកាល ពោលគឺកីឡាករវ័យ ២៣ឆ្នាំរូបនេះ នឹងបន្តរួមរស់នៅទឹកដី Santiago Bernabeu រហូតដល់ឆ្នាំ២០២៧។
តាមពិតទៅ Valverde មានកិច្ចសន្យាចាស់ដែលមានសុពលភាពរហូតដល់ឆ្នាំ២០២៥ ទៅហើយ ខណៈការបន្តកិច្ចសន្យាបន្ថែមទៀតនេះ នាំឱ្យកីឡាកររូបនេះមានកិច្ចសន្យាដែលមានសុពលភាពវែងជាងគេបង្អស់ ក្នុងចំណោមកីឡាករផ្សេងៗទៀតក្នុងក្រុមរបស់ Real Madrid បច្ចុប្បន្ន។
គួរបញ្ជាក់ថា Valverde គឺជាអតីតយុវជនរបស់ក្លិប Penarol មុននឹងផ្ទេរមក Real Madrid នៅឆ្នាំ២០១៦ ពេលដែលគេមានវ័យ១៨ឆ្នាំ។ មកដល់ Real Madrid កីឡាកររូបនេះមិនទាន់បានបញ្ចូលក្នុងក្រុមធំនៅឡើយ ដោយបានចូលរួមជាមួយថ្នាលយុវជន Real Castillas មុននឹងត្រូវបានដាក់ឱ្យក្លិប Deportivo La Coruna ខ្ចីជើងនៅឆ្នាំ២០១៧។
កាលពីរដូវកាលមុន Valverde ធ្លាប់ទទួលរងនូវបញ្ហារបួសដែលនាំឱ្យគេអវត្តមានមួយរយៈ តែក៏នៅតែបង្ហាញទម្រង់គួរឱ្យចាប់អារម្មណ៍ដដែល ខណៈ Bayern Munich ក៏ធ្លាប់បង្ហាញចេតនាចង់ចូលចែចូវកីឡាកររូបនេះដូចគ្នា ប៉ុន្តែការបន្តកិច្ចសន្យារយៈពេលវែងដល់ឆ្នាំ២០២៧នេះ ល្មមគ្រប់គ្រាន់នឹងបញ្ចប់ការចង់បានរបស់ក្លិបយក្សអាល្លឺម៉ង់នេះផងដែរ៕